सांगली बार असोसिएशनच्या निवडणुकीचे बिगुल वाजले; ३० एप्रिलला रणसंग्राम!
सांगली (न्याय विश्व वृत्तसेवा):
सांगली वकील वर्तुळाचे लक्ष लागून राहिलेल्या सांगली बार असोसिएशनच्या सन २०२६-२७ या वर्षाच्या कार्यकारी मंडळाचा निवडणूक कार्यक्रम जाहीर झाला आहे. निवडणूक समितीने सोमवारी याबाबतची अधिकृत घोषणा केली असून, ३० एप्रिल रोजी मतदान आणि त्याच दिवशी निकाल जाहीर होणार आहेत. या घोषणेमुळे सांगली न्यायालयाच्या आवारात आता निवडणुकीची रणधुमाळी खऱ्या अर्थाने सुरू झाली आहे.
असे आहे निवडणूक वेळापत्रक:
निवडणूक समितीने दिलेल्या माहितीनुसार, निवडणूक प्रक्रिया खालील टप्प्यात पार पडणार आहे:
- अर्ज भरण्याची मुदत: १३ एप्रिल ते २० एप्रिल २०२६ (सकाळी ११ ते सायंकाळी ५ वाजेपर्यंत).
- अर्जांची छाननी: २१ एप्रिल २०२६ (दुपारी ३ ते ४ वाजेपर्यंत).
- अर्ज माघारीची मुदत: २१ एप्रिल ते २४ एप्रिल २०२६ (दुपारी ३ वाजेपर्यंत).
- अंतिम उमेदवारी यादी: २४ एप्रिल रोजी सायंकाळी ४ वाजता प्रसिद्ध केली जाईल.
- मतदान: ३० एप्रिल २०२६ रोजी सकाळी ८ ते सायंकाळी ५ या वेळेत पार पडेल.
- मतमोजणी व निकाल: ३० एप्रिल रोजीच सायंकाळी ६ वाजल्यापासून मोजणीला सुरुवात होऊन निकाल घोषित करण्यात येतील.
१५ जागांसाठी होणार लढत; अनुभवाची अट कडक
यावर्षी एकूण १५ जागांसाठी निवडणूक होत असून, नव्या घटनेनुसार पदांसाठी अनुभवाची अट निश्चित करण्यात आली आहे.
- अध्यक्ष पदासाठी २५ वर्षे वकिलीचा अनुभव आवश्यक असून १२,००० रुपये अनामत रक्कम ठेवण्यात आली आहे.
- उपाध्यक्ष (२० वर्षे अनुभव, ९,००० रु. अनामत), सेक्रेटरी (१५ वर्षे अनुभव, ७,००० रु. अनामत) आणि सहसेक्रेटरी (७ वर्षे अनुभव, ५,००० रु. अनामत) अशी रचना आहे.
- याशिवाय सदस्य (पुरुष) ६ जागा आणि सदस्य (महिला) ४ जागांसाठी निवडणूक होणार असून, त्यासाठी ५ वर्षांच्या अनुभवाची अट आहे.
अनामत रक्कम बिनपरतीची
निवडणूक समितीने स्पष्ट केले आहे की, उमेदवारी अर्जासोबत भरावी लागणारी अनामत रक्कम ही 'बिनपरतीची' (Non-refundable) असेल. महिला प्रतिनिधीत्वासाठी सहसेक्रेटरी आणि सदस्य पदावर राखीव जागा ठेवण्यात आल्याने महिला वकिलांमध्येही उत्साहाचे वातावरण आहे.
सांगली बार असोसिएशन ही जिल्ह्यातील प्रतिष्ठित संघटना असल्याने या निवडणुकीत कोणत्या पॅनेलचे वर्चस्व राहणार, याकडे संपूर्ण जिल्ह्याचे लक्ष लागले आहे. सोमवार, दि. ६ एप्रिल रोजी झालेल्या निवडणूक समितीच्या बैठकीत हा निर्णय घेण्यात आला असून, समितीचे अध्यक्ष व उपाध्यक्ष यांनी या प्रक्रियेवर शिक्कामोर्तब केले आहे.
Post a Comment
0Comments